A było tak:

23 listopada w St. Finnbarrs GAA, Togher Cork.
Party Masters – 12 Party Biesiada Śląska

Padom wom …
Biyda mi było sztartnoć z łopisym 12 Biesiady Ślonskij
Bo prowda je tako że ci co nie byli niech nie pyskujom ino fest żałujom
Sztartli my ło siodmyj, ale raja do dźwiyrzy była już łod poł siodmyj
Fest bogato banda z łochrony filowała na włażoncych i wachowała co by był ordnung
W końcu wysztiglowano loża VIP czyli:
Lila naszo Prezeska do kupy z Asiom, Franzym i Edikym kery przemawioł keby wylynkany
łotwarli Dwanosto Biesiada Ślonsko
Niezawodne karlusy z Party Masters w życiowej formie wspomogli łotwiyrajoncych
Potym łostre przywitanie DiDżejof i poszło wartko z gorki
Stoły były pełne roztomajtych maszketow i sznitow z tustym że o łogorkach nie wspomna…
Szynk z piwskiem do wyboru do koloru też łotwarli. Loli nasze Tyskie ale i irskie whiskey szło duldać.
Potem już ino bigel, śpiyw i hulanie łomane przez konkursy
Hitym ostatnich lot był test gorolski a po mojymu wiedza z godki ślonskij
No i tukej krzinia z podium była tako:
1. Bart
2. Marek
3. Basia
Gratulacje!

Padom wom co byli biesiadniki w wieku łod bajtla chyba łod 6 lot do 99
Ale bajtle odkludzili do dom kole dziewiontyj. Bo potym już ino było 18+
Ale gryfne frele latoś obrodziły.
Pofukane parfinami miały okazjo jak zowdy szterować kichole i gały tyż szwarnych karlusow.
Terozki curik i łopowiem co tam na placu było…
A tam karlusy ciśli z robotom przy tyglach, uwijali sie fest i piekli woszty i krupnioki.
Yno że ani jeden karlus ni mioł mantelszyrcy a tuste tam jednak dżistało
Presa mieli na tyglach jak we autobusie nomer 7 z Katowic do Zobrzo, no ale dużo nos było a kożdy
chcioł co na gorko mamlać.
Po żarli, po pili i do bigla wrocili. Ciśli gynsiego, tańcowali jak DiDżeje pokozali, machali, klaskali aż mlaskali
Nikerzy za wartko duldali i sie porychtowali i łosłabli

… a było tak że jak ftoś prziloz co by ino badnonć jak je to już kożdy chce na bez rok prziść
na łokrągło CZINOSTO BIESIADA ŚLONSKO ! A bydzie sie wyrobiało 🙂
Łobsztalujcie sie to już dzisioj w gowach bo zaś bydzie okazjo na biglu sie zafuczeć

We skrocie wszystkim za tyn rok dziynki i ZAPROSZOMY na CZINASTKA !!!

To naszkryfloł Jo.

 

Zdięcia z Biesiady znajdzesz TUTAJ